Ning ndi parane

Lewung

Lukisan Batik

ABANG BIRU

ABANG BIRU

Denin : Aksara Sudra

Kaya dene werna abang semu ireng

Nggaris tumandes sak njeroning ati

Mambu ganda bacin ngambar-ambar

Kasaput samirana

Kahanan wis ora bisa ngracik ukara tresna

Sing tansah ngiwi-iwi

Apa maneh gawe tembang asmaradhana

Rasa pangrasa wus sirna

Beberengan remuk rempuning ati iki

Raga tuwa

Wus ilang daya upayane

Cahyaning ora katon padang maneh

Kaya wingi uni

Raga tuwa

Wus lungkrah guwayane

Saiki hamung kasampir ing pinggiring kori

Tuladha budhi,panggula wenta

REUNI

REUNI

Rasaku kawur katiyup samirana

prasasat ngubengi jagat kang wus kliwat

rasa pangrasa tansah temlawung

marang jaman kang wus kawuri

Isih kelingan cetha wela-wela

nalikane para kadang pada gegojekan

ing pawiyatan luhur,

kabeh cahyaning pada sumringah

kayadene meseme kembang melati

Rasa kangen iku tansah kasimpen

sajrone ati linambaran prastya suci

sanajan kabeh mau wis beda ing kahanan

ananging rajutan rajutan tali silaturahmi

kudu tansah cinekel kenceng ing ati suci

LINGSIR

LINGSIR

Srengene wis ngglempang

semampir ing pojok garis langit

sing ditinggal hamung cahya burem

mertandani kahanan peteng sing bakal teka

Aku ora selak yen saiki

sliramu tansah amping-amping pepeteng

kanggo nguripi bocah-bocah,

ora perlu sumelang kabeh mau

isih dadi lelakon, sing tundone mesti ana

tutupe laku kanggo nggayuh kanugrahan

Aja sumelang uga aja tida-tida

yen gusti kang murbeng jagat paring welas lan asih marang kawulane

sing bener-bener duwi gegayuhan becik

Delengen srengenge sing wis lingsir kae

ana garis putih nyleret ngubengi jagat

nganti ra isa disawang, ilang ing pandulu

yo kuwi mertandani tresnaku tanpa wates

lila legawa nampa sliramu apa anane

        (Aksara sudra tutup tahun 2016)

BECIK KETITIK ALA KETARA

BECIK KETITIK ALA KETARA

: kanggo sliramu

: Bebarengan mangsa sing tansah sulaya

ukara ukara iku tak tulis linambaran rasa kuciwa

kayadene suweke godong gedang kasuput angin lesus

rojah rajeh tan bisa ditambal maneh

ukara sing tansah ndak simpen rapet ing pokjok ati

saiki wutah tan bisa dibendung maneh

kaya miline segara nalika mangsa prahara

ya amarga pituturmu sing tanpa waton tansah sujana tanpa landesan

sliramu tansah cubriya yen aku pancen maling aguna, saben saben sliramu

kelangan donya brana

aku pancen wis ora pakra golek banda donya

amarga lungkrahe raga sing tuwa tan kuwawa ngupaya upa

aku nglegena sak kabehane

nanging aku dudu maling aguna sing tansah nyolong njupuk

darbeke liyan apa maneh nggone wong sing tak tresnani

nanging kabeh mau tanpa guna anggonku menehi alesan

sliramu tetep wae gawe prasangka yen aku maling aguna

ya mung kanti ukara sing dak rakit kanti tetesing luh

muga muga bisa ndadeake entenge rasa sing tan kuwawa tak sangga

ati iki saiki dadi suwung tanpa rasa tresna

anane amung rasa gela lan kuciwa

kabeh mau pancen garis sing kudu tak tanpa kanti legawa

legawa lan percaya yen becik pasti ketitik lan ala mestine ketara

                                                                        jomblang 21 maret 2017